ငွေစက္ကူအတုပြုလုပ်သူများကို သက်ဆိုင်ရာနိုင်ငံများနှင့် ပူးပေါင်းဖော်ထုတ်ပြီး ထိထိရောက်ရောက် အရေးယူတော့မည်

ငွေစက္ကူအတုပြုလုပ်သူများကို သက်ဆိုင်ရာနိုင်ငံများနှင့် ပူးပေါင်းဖော်ထုတ်ပြီး ထိထိရောက်ရောက် အရေးယူတော့မည်

ငွေစက္ကူအတုပြုလုပ်သူများကို သက်ဆိုင်ရာနိုင်ငံများနှင့် ပူးပေါင်းဖော်ထုတ်ပြီး ထိထိရောက်ရောက် အရေးယူမည်ဖြစ်ကြောင်း နိုင်ငံတော်သမ္မတရုံးဝန်ကြီးဌာန ပြောရေးဆိုခွင့်ရှိသူ ညွှန်ကြားရေးမှူးချုပ် ဦးဇော်ဌေးက ပြောသည်။

နိုင်ငံတော်သမ္မတရုံးတွင် ဒီဇင်ဘာလ ၈ ရက်ကပြုလုပ်သော သတင်းစာရှင်းလင်းပွဲ၌ လက်ရှိဖြစ်ပွားနေသော စင်္ကာပူနိုင်ငံမှ မြန်မာနိုင်ငံသို့ လာရောက်သူများထံမှ ကျပ်တသောင်းတန် မြန်မာငွေစက္ကူအတုများ ဖမ်းဆီးရမိသည့်ဖြစ်စဉ်များနှင့် ပတ်သက်၍ မေးမြန်းမှုအပေါ် ပြောကြားခဲ့ခြင်းဖြစ်သည်။

သမ္မတရုံး ညွှန်ကြားရေးမှူးချုပ် ဦးဇော်ဌေးက “ငွေစက္ကူ အတုလုပ်တဲ့လူတွေကိုတော့ ထိထိရောက်ရောက်၊ ပြင်းပြင်းထန်ထန် အရေးယူမယ်။ ပေါ်ပေါက်အောင် စစ်ဆေးဆောင်ရွက်မယ်” ဟု ပြောသည်။

ဆက်လက်ပြီး “ နိုင်ငံချင်း ပူးပေါင်းဆောင်ရွက်ဖို့လည်း ရှိပါတယ်။ ဒီဟာတွေက ဘယ်ကလာလဲ။ ဘယ်က ထွက်လဲဆိုတာ ကျနော်တို့က ဥပမာ ပြည်တွင်း မဟုတ်ဘူးဆို ပြည်ပနဲ့ ဆက်စပ်လား၊ ဆက်စပ်တယ်ဆို ကျနော်တို့ ပူးပေါင်းဆောင်ရွက်ပြီး ဖော်ထုတ်သွားဖို့ရှိပါတယ်” ဟု ဦးဇော်ဌေးက ပြောသည်။

ပြီးခဲ့သည့် နိုဝင်ဘာလကုန်ပိုင်းတွင် မြန်မာနိုင်ငံသို့ လာရောက်သော စင်္ကာပူနိုင်ငံသားစုံတွဲထံမှ ကျပ်တသောင်းတန် ငွေစက္ကူ အတုများတွေ့ရှိသဖြင့် စစ်ဆေးမှုများပြုလုပ်ခဲ့ရာ ထိုငွေများမှာ စင်္ကာပူနိုင်ငံရှိ ငွေလှဲလှယ်ရေးလုပ်ငန်းများမှ လဲလှယ် ရရှိခဲ့ကြောင်း မြန်မာနိုင်ငံရဲတပ်ဖွဲ့ထံ ထွက်ဆိုခဲ့သည်။

ယင်းကိစ္စနှင့် ပတ်သက်ပြီး စင်္ကာပူရဲများကလည်း ငွေလဲလှယ်ရေးလုပ်ငန်း ၁၈ ခုကို ရှာဖွေခဲ့ရာ AG နှင့် AE အက္ခရာတို့ဖြင့် စပြီး အမှတ်စဉ်နံပါတ်များ တထပ်တည်းတူညီနေသည့် တသောင်းတန် မြန်မာငွေစက္ကူများကို တွေ့ရှိခဲ့ကြောင်း Channel News Asia သတင်းတွင် ဖော်ပြထားသည်။

အဆိုပါစင်္ကာပူနိုင်ငံသားနှစ်ဦးသည် လက်ရှိတွင် စင်္ကာပူသံရုံး၏ အကူအညီရယူနေကြောင်း သိရသည်။

အလားတူဖြစ်စဉ်အနေဖြင့် ငွေစက္ကူအတု သတင်းအရ ရဲတပ်ဖွဲ့မှ ရှာဖွေစစ်ဆေးစဉ် ပဲခူးတိုင်း ဒိုက်ဦးမြို့နယ်နေ အမျိုးသမီးငယ်တဦးထံမှ ကျပ်တသောင်းတန် ငွေစက္ကူအတု သိန်း ၃၀ ခန့်ကို ဒီဇင်ဘာလ ၆ ရက်က တွေ့ရှိခဲ့ရကြောင်း ပြည်ထဲရေးဝန်ကြီးဌာနက သတင်းထုတ်ပြန်ထားသည်။

အဆိုပါငွေစက္ကူ အတုများကို စင်္ကာပူနိုင်ငံတွင် အိမ်အကူအဖြစ် လုပ်ကိုင်ခဲ့ခြင်းအတွက် ရရှိခဲ့ခြင်းဖြစ်ပြီး အိမ်ရှင်ဖြစ်သူက စင်္ကာပူနိုင်ငံရှိ ငွေလဲလှယ်ရေးလုပ်ငန်းတခုတွင် လဲလှယ်ကာ လုပ်အားခအဖြစ်ပေးချေခဲ့ခြင်းဖြစ်သည်ဟု ရဲတပ်ဖွဲ့ထံ ထွက်ဆိုထားကြောင်း သိရသည်။

ယင်းအမျိုးသမီးငယ်ကို ဒိုက်ဦးမြို့မရဲစခန်း (ပ) ၁၄၂၀/ ၂၀၁၈၊ မြန်မာနိုင်ငံတော် ဗဟိုဘဏ် ဥပဒေပုဒ်မ ၁၀၅/ ၁၀၆ ဖြင့် အမှုဖွင့်စစ်ဆေးလျှက်ရှိကြောင်း သိရသည်။

ပြည်တွင်း၌ ငွေကြေး လည်ပတ်စီးဆင်းမှုရာ၌ ပြည်သူများလက်တွင်းသို့ ငွေကြေးအတုများ ရောက်ရှိလာတတ်ပြီး ဘဏ်ငွေလွှဲခြင်းကဲ့သို့သော ကိစ္စများတွင် ငွေအတုဖြစ်ကြောင်း စစ်ဆေးပေါ်ပေါက်၍ နစ်နာဆုံးရှုံးမှုများရှိနေကြောင်း၊ ငွေအတုပြုလုပ်သူများကို အဓိက ဖမ်းမိစေလိုကြောင်း လူမှုကွန်ယက်သုံးစွဲသူများက ဝေဖန်မှုများရှိနေသည်။

ငွေစက္ကူအတုပြုလုပ်ခြင်းသည် ရာဇဝတ်ပြစ်မှုဖြစ်ပြီး အတုတွေ့ရှိသည်နှင့် ဖမ်းဆီးထိန်းသိမ်း၍ အမှုပေါ်ပေါက်မှုအရ ကွင်းဆက်ဖော်ထုတ် အရေးယူနေကြောင်း၊ ပြည်သူများအနေဖြင့် ငွေအတုမလုပ်သော်လည်း လက်ဝယ်ရောက်ရှိလာသည့် ငွေအတုအချို့အတွက် နစ်နာဆုံးရှုံးမှုရှိနိုင်ပြီး ပြည်သူတဦးချင်း၏ နစ်နာမှုအပေါ် အစိုးရက လိုက်လံဖြေရှင်းရန် ခက်ခဲကြောင်း ဦးဇော်ဌေးက ပြောသည်။

“ကာယကံရှင်တွေကတော့ ဒီအပေါ်မှာ အတုရလာတဲ့အတွက် နစ်နာမှုကတော့ ကျနော်တို့ အစိုးရအနေနဲ့ လူတိုင်းလူတိုင်းကို လိုက်ပြီးတော့ ဖြေရှင်းဖို့တော့ ခက်တယ်လို့ ကျနော်ပြောချင်တယ်”ဟု ဆိုသည်။

ဥပဒေတွင် ငွေအတုကို ကိုင်ဆောင်ခွင့်မရှိဟု ပြဌာန်းထားသည့်အတွက် ပြည်သူများအနေဖြင့် ငွေအတုကို သတိပြုရန်လိုမည်ဖြစ်ကြောင်း၊ ငွေအတုနှင့် ပတ်သက်ပြီး စွပ်စွဲခံရပါက မိမိတွင် အပြစ်မရှိလျှင် ခိုင်လုံသောအထောက်အထားများ တင်ပြနိုင်ရမည်ဖြစ်ကြောင်း ရှေ့နေတစ်ဦးဖြစ်သည့် လယ်ဝေးမြို့နယ်မှ လွှတ်တော်ကိုယ်စားလှယ် ဦးမျိုးဇော်ဦးက ပြောသည်။

ပုလဲမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါ်ခင်စန်းလှိုင်ကလည်း “ငွေအတုက အပြင်မှာ အတုဖြစ်ပြီး ဝင်သလား၊ တိုင်းပြည်ထဲမှာပဲ အတု ထုတ်သလား ဆိုတာကလည်း သိဖို့ ခက်ခဲပါတယ်။ ကိုယ့်ပြည်တွင်းလူပဲ ဖြစ်ဖြစ် ပြည်ပက လူပဲဖြစ်ဖြစ် ကိုယ်တိုင်မလုပ်ဘဲနဲ့ မသိနားမလည်လို့ ဖြစ်လာရတဲ့ ကိစ္စမျိုးဆို နစ်နာမှု မရှိအောင် ဆောင်ရွက်ဖို့ လိုတယ်လို့ ပြည်သူတွေဘက်က ပြောချင်ပါတယ်” ဟု ပြောသည်။

ငွေစက္ကူအတု ပြဿနာနှင့်ပတ်သက်ပြီး အတုပြုလုပ်သူများကို ထိရောက်စွာ အရေးယူသွားမည်ဖြစ်ပြီး ဖွဲ့စည်းပုံ အခြေခံ ဥပဒေတွင် ပြဌာန်းထားသကဲ့သို့ လက်ရှိအသုံးပြုနေသော ငွေကြေးများကို တရားမဝင်ဟု ကြေငြာသည့် ကိစ္စမျိုး ပြုလုပ်မည်မဟုတ်ကြောင်းလည်း ဦးဇော်ဌေးက ဆိုသည်။

( Irrawaddy)

ဗဟုသုတ(www.bahututa)

Comments are closed.