အကြွေးသိန်းသုံးထောင်ကျော်ပြန်မရဘူးဆိုတဲ့ ဂျွန်လွင်

အကြွေးသိန်းသုံးထောင်ကျော်ပြန်မရဘူးဆိုတဲ့ ဂျွန်လွင်

ဂျွန်လွင်ဟာဆိုရင် မော်ဒယ်အေဂျင်စီထောင်ထားသလို ပွဲစီစဉ်သူတစ်ဦးလည်းဖြစ်ပါတယ်။ အနုပညာလောကထဲမှာလည်း သြဇာအရှိန်အဝါကြီးမားတဲ့ ဂျွန်လွင်ဟာ နာမည်ကြီးမင်းသားမင်းသမီးတွေရဲ့လက်ဦးဆရာဖြစ်ခဲ့ဖူးသလို လေးစားမှုရရှိထားတဲ့ သူတစ်ဦးလည်းဖြစ်ပါတယ်။ ဂျွန်လွင်က သူဟာ မရှိဆင်းရဲသူတွေဒုက္ခရောက်သူတွေကိုကူညီတတ်ပေမယ့် လူတွေကိုတော့ ပိုက်ဆံထပ်မချေးတော့ဘူးလို့ Eleven Media နဲ့ အင်တာဗျူးတစ်ခုမှာပြောလာခဲ့ပါတယ်။

ဂျွန်လွင်က ပိုက်ဆံသိန်းသုံးထောင်ချေးထားတာပြန်မရတော့တဲ့အကြောင်း “ကျွန်တော့်ရဲ့ရုံးဝမှာ ပိုက်ဆံချေးချင်တဲ့သူတိုင်းကို ရုံးဝကနေလှည့်ပြန်ပါလို့ရေးထားရလဲဆိုတော့ ကျွန်တော့်ကိုလူတွေက ဝေဿန္တရာမင်းကြီးများထင်နေလားမသိဘူး။ နှစ်ဆယ့်လေးနာရီ ဖုန်းတွေဆက်ဆက်ပြီး ပိုက်ဆံချေးကြတယ်။ ငယ်သူငယ်ချင်းတစ်ယောက်ဆိုရင် သိန်းသုံးရာနဲ့လေးဆယ်ကိုချေးပေးလိုက်တယ်။ ပြန်ဆပ်တော့ ငါးဆယ်လောက်ဆပ်လို့ရမလားတဲ့။ သိန်းသုံးထောင်ကျော်လောက်ရှိတယ် ချေးထားတာ။ အခုထိကိုတစ်ပြားမှပြန်မရဘူး။ ဝန်ထမ်းတွေဆိုလည်း အိမ်လိုတယ်ဆို အိမ်ငှားတယ်။ နင်တို့လစာထဲက ကြိုက်သလောက်ဆပ်ကြလို့။ အဲဒါကိုအဲ့လိုမျိုးဆပ်တာလည်းမရှိဘူး။ ကျွန်တော်ကလူတွေကိုကူညီချင်တယ်။ဒါပေမယ့်ဘာမှပြန်မရဘူး။ သူတို့အဆင်မပြေလို့ပဲလေဆိုပြီး သိန်းသုံးထောင်ကျော်အကြွေးနဲ့ပဲရပ်ထားလိုက်တော့မယ်ပေါ့နော်”လို့ ရင်ဖွင့်ထားပါတယ်။

ဂျွန်လွင်က လူတွေကိုကူညီချင်တာပဲရှိပြီး နိုင်ငံတော်ကချီးမြှင့်တဲ့ဘွဲ့တွေလိုချင်လို့မဟုတ်ဘူးလို့လည်း “ကျွန်တော်လှူထားတာတွေကို #JohnLwinDonation လို့ Facebook မှာရိုက်ရှာကြည့်ရင်အများကြီးကျလာလ်ိမ့်မယ်။ကျွန်တော်လှူထားတာတွေ။ ကျွန်တော်က နိုင်ငံတော်က ချီးမြှင့်တဲ့ သီရိသုဓမ္မဘွဲ့တွေလိုချင်လို့လည်းမဟုတ်ဘူး။ ကျွန်တော်လိုချင်တာသည် ကျွန်တော်လုပ်ပေးလိုက်တဲ့အလုပ်တစ်ခုက အခြားတစ်ယောက်ရဲ့ဘဝမှာ ထိရောက်စွာနဲ့ အကျိုးရှိသွားရမယ်။ အဲဒီလူရဲ့ဘဝဟာ သာယာစိုပြေပြီးသူအိပ်လိုက်တဲ့အခါမှာ စိတ်ချမ်းသာကိုယ်ချမ်းသာနဲ့အိပ်သွားနိုင်လောက်တဲ့အခြေအနေတစ်ခုလောက်ရောက်အောင်ကျွန်တော်လုပ်ပေးချင်တယ်”လို့ ပြောပြထားပါတယ်။

ဂျွန်လွင်က မကြာသေးမီကပြုခဲ့တဲ့အလှူတစ်ခုအကြောင်းကိုလည်း ကြည်နူးစရာ စားမြုံ့ပြန်ထားပါသေးတယ်။ “နေပြည်တော်သွားတဲ့ ၉၉ မိုင်နဲ့ ၂ဖာလုံမှာပေါ့နော်။ ဘုန်းကြီးကနေ စစ်ပြေးဒုက္ခသည်ကလေးလေးတွေကိုထိန်းထားတာ။ တော်တော်လည်းအဆင်မပြေဘူး။ ဒုက္ခတွေရောက်နေတယ်ကြားတာနဲ့ ကျွန်တော်တို့ ချက်ချင်းသွားပြီး အဲဒီမှာ ကျွန်တော်ကတော့ ဆယ်သိန်းမတည်တာပေါ့။ ကျွန်တော်နဲ့ပတ်သက်တဲ့ Facebook က Friend တွေကလည်းဝိုင်းလှူတယ်ပေါ့နော်။ ကျွန်တော်တို့ ၃၂ သိန်းသွားလှူလိုက်တယ်”လို့ ပြောပြထားပါတယ်။

Comments are closed.